考試×第三回×基礎統計學方法

一如已往, 無論係考日頭定夜晚, 我都係會一早返學校溫下書先.

中途乘小巴, 後邊坐了個粗口王, 佢一上車就講電話, 一講電話就係咁爆粗, 佢起每句句子或詞語之間都會插d粗口入去, d粗口仲好長, 最常用係"X你老X西", 聽一句說話要花多幾倍時間, 因為太多粗口, 佢一開始係咁, "喂, 小強, X你老X西, 我係 咩咩 呀, X你老X西, 我搭緊小巴lor, X你老X西...", 一程十分鐘的車程, 起碼爆過百次粗. 唉, 真係好想錄低佢, 比返佢聽...

返到學校, 去HW 3F個洗手間啦, 聽到d睇報紙聲, 唔係第一次聽到. 我又唔明啦, 點解d人可以起廁格慢慢嘆報紙, 附近有好多好舒適既地方丫, 貪廁所香? 貪廁所乾淨? 比我連坐落去都唔敢啊, 咁大疊報紙, 個廁格又唔係大, 都唔知佢點睇, 定係我誤會左佢冇廁紙呢?

其實講粗口同起廁所睇報紙都係人地既自由, 我都唔知寫起度做咩. 不過平時, 我見到有咩唔滿意的地方都會直接講出來, 有時態度又唔好添, 或者我應該多d從人地角度睇野,

今日又去左多媒體室, 我很喜歡多媒體室, 深沉, 寂靜, 很適合溫習, 排列著很酷的mac機和藍背景, 與別不同的感覺, 如果我住得近, 一定會多點去溫習.





為了避免考試時飯氣攻心, 提早去午飯. 午飯前, 先去理學院. 話說佢寄左email來叫我交Poster的softcopy, 之但係我又唔可以經email send返比佢, 一定要用floppy/cd載住親自拎比佢, 咁都有. 交左隻floppy, 就順便拎埋個Prize, 佢比左盒野我, 有d意外, 我諗住佢求其唔知點樣有d撻皮野就算. 估唔到有個盒, 先要推出來, 打開盒面, 再打開塊墊, 好開心, 有拆禮物feel.



打開左, 其實都係d撻皮野, 哈哈, 有理學院牌的筆, 鎖匙扣同個小皮包, 都幾精美啦, 哈哈, 最喜歡個鎖匙扣, 銀色的金屬印上書法字的Logo. 今次完全係意外收獲, 其實獎品係咩都唔重要, 重要既係你做既野得到認同, 你既作品得到讚賞, 已經好足夠. 早幾日, 亞視下午麼麼茶訪問左個本地設計師, 共獲得過450個獎項. 我很佩服從事設計, 以創作維生的人, 同時具備創意和技術. 雖然我很喜歡玩Graphics, Animation 同 website, 但自問未到能賴以維生的境地, 還是作為課餘興趣好了.



飯後, 回lab, 經過lab外的board, 無意中看到一個曾去過的career talk的一些相片. 哈哈, 睇下有邊個唔好彩無端端比人貼上板先, 睇下睇下, 點知, 見到自己......

入到lab, 點知又見到Beta同Ivy...點解成日都見到佢地...


搵下我起邊..haha...

二時半開考, 基礎統計學方法. 之前做佢d pastpaper, 見到d題目, 個人會好迷網, 好驚, 因為佢d題目題題都差唔多樣, 比埋d野唔係話有幾多個sample, 就係probability幾多幾多, 但係計法就數以十計, 個個計法都差唔多, 要好細心咁留意返條題目, 從文字上理解, 諗返個正確計法, 諗錯隔離就全部炒晒. 對於我這種唔細心既人, 這次是極大挑戰. 在未考的時間, 我很定自己患上統計題目恐懼症, 好驚自己對住d題目明明應該識做, 又諗唔返點做, 一諗起個人就會心悸, 情緒低落, 面容扭曲等. 考試佔75%, 而平時d assignment, attendance, test人人都差唔多, 所以考試是超重要. 考兩個鐘, 七條題目, 人家考開三個鐘架嘛, 今次得兩個鐘, 令我更不安. 結果, 跟預期一樣, 時間很緊湊, 做得超趕超急, 雖然做得九九十十, 不過冇信心話自己岩. 考完, 前面的Irene問我, 第一題乜乜計到咩呀, 第五題乜乜計到咩呀, 第七題乜乜計到咩呀, 我都答佢唔到, 雖然只係剛剛的事, 我都唔記得自己做過咩lu.


答案